இரட்டை இலை – விசில் சின்ன விவகாரம்: தேர்தல் ஆணையத்திடம் இன்பதுரை, எம்.பி. புகார்!

மதுராந்தகம் தேர்தல் பிரச்சாரத்தில் அமைச்சர் ஆதவ் அர்ஜூனாவின் பேச்சு குறித்து அதிமுக மாநிலங்களவை உறுப்பினரும், தமிழ்நாடு அதிமுக வழக்கறிஞர் பிரிவு செயலாளருமான ஐ.எஸ். இன்பதுரை தேர்தல் ஆணையத்திடம் புகார் அளித்துள்ளார். 

அவரது புகார் மனுவில் கூறப்பட்டிருப்பதாவது: மதுராந்தகம் தொகுதியில் 23.09.2026 நடைபெற்ற பிரச்சாரத்தில், தமிழக வெற்றிக் கழகத்தின் தேர்தல் பிரசார மேலாண்மைப் பொதுச் செயலாளர் ஆதவ் அர்ஜுனா “இரட்டை இலை முடிந்துவிட்டது” என்றும், எம்.ஜி.ஆர்.–ஜெயலலிதாவின் அரசியல் பாரம்பரியம் தற்போது “விசில்” சின்னத்தில் இருப்பதாகவும் பேசியதாக செய்திகள் வெளியாகியுள்ளன.

மேலும், முன்னதாக நடைபெற்ற பிரச்சாரத்தில் “இரட்டை இலை – விசில் ஒன்றே” என்ற பொருளிலும் பேசியதாக தகவல்கள் வெளியாகியுள்ளன. இதுகுறித்து இந்திய தேர்தல் ஆணையம் மற்றும் தமிழ்நாடு தலைமைத் தேர்தல் அதிகாரியிடம் புகார் அளித்துள்ளேன்.

இரட்டை இலை மற்றும் விசில் இரண்டு வெவ்வேறு அரசியல் கட்சிகளுக்கு ஒதுக்கப்பட்ட தேர்தல் சின்னங்கள். அவற்றை ஒன்றாகச் சித்தரிப்பதன் மூலம் வாக்காளர்களிடையே தேர்தல் அடையாளம் தொடர்பான குழப்பம் ஏற்படுத்தப்பட்டதா என்பதை தேர்தல் ஆணையம் விசாரிக்க வேண்டும்.

எனவே, தேர்தல் ஆணையம் முழுமையான வீடியோ, ஆடியோ பதிவுகள் மற்றும் பிரச்சாரப் பொருட்களை ஆய்வு செய்து, சம்பந்தப்பட்டவர்களிடம் விளக்கம் கோர வேண்டும். முக்கியமாக, Election Symbols (Reservation and Allotment) Order, 1968-ன் Para 16A-ன் கீழ், TVK-க்கு Show Cause Notice அனுப்பி, விளக்கம் கேட்க வேண்டும்.

அந்த விசாரணையில் Model Code of Conduct அல்லது தேர்தல் ஆணையத்தின் சட்டபூர்வ உத்தரவுகள் மீறப்பட்டிருப்பது உறுதி செய்யப்பட்டால், Para 16A-ன் கீழ் TVK-வின் அங்கீகாரத்தை தற்காலிகமாக Suspend செய்யவும், தேவையான பட்சத்தில் அங்கீகாரத்தை Withdraw செய்யவும் தேர்தல் ஆணையம் நடவடிக்கை எடுக்க வேண்டும் என்பதே எங்களது கோரிக்கை.

நாங்கள் வெறும் “இரட்டை இலை – விசில்” என்ற ஒப்பீடு மட்டுமே Section 123, R.P. Act கீழ் corrupt practice என்று கூறவில்லை. முழுமையான பேச்சு, அதன் சூழல் மற்றும் பிரச்சாரப் பொருட்களை ஆய்வு செய்து, வாக்காளர்களிடையே தேர்தல் சின்னம் தொடர்பான குழப்பத்தை ஏற்படுத்தும் வகையில் தேர்தல் நடத்தை விதிகள் மீறப்பட்டுள்ளதா என்பதை தேர்தல் ஆணையம் ஆய்வு செய்ய வேண்டும். தேர்தல் சின்னங்களின் தனித்துவமும், வாக்காளர்களின் தெளிவான முடிவும் பாதுகாக்கப்பட வேண்டும் எனத் தெரிவித்துள்ளார். 

“சேலம் மாநகர் குடிநீர் வினியோகத்தை தனியார் மயமாக்கும் நடவடிக்கையை கைவிட வேண்டும்!”