தேனி மாவட்டம் கம்பத்தில் ஸ்ரீ மந்தை அம்மன் கோவில் திருவிழாவை முன்னிட்டு மாபெரும் இரட்டை மாட்டு வண்டி எல்கை பந்தயம் வெகுவிமரிசையாக நடைபெற்றது.
தேனி மாவட்டம் கம்பம் தெற்கு வட்டம் ஸ்ரீ மந்தை அம்மன் கோவிலின் புரட்டாசி மாத திருவிழாவை முன்னிட்டு, மாபெரும் இரட்டை மாட்டு வண்டி எல்கை பந்தயம் நடத்தப்பட்டது. கம்பம் நகரில் இருந்து கம்பம் மெட்டு மாநில நெடுஞ்சாலையில் எட்டு கிலோமீட்டர் தூரம் வரை நடைபெற்ற இந்த மாட்டு வண்டி எல்கை பந்தயத்தில், தேனி, மதுரை, சிவகங்கை, திண்டுக்கல், திருச்சி உள்ளிட்ட பல்வேறு மாவட்டங்களிலிருந்து ஏராளமான ஜோடி மாட்டு வண்டிகள் பங்கேற்றன.
பந்தய எல்லையை நோக்கி மாட்டு வண்டிகள் சீறிப்பாய்ந்து சென்றபோது, போட்டியிட்ட மாடுகளையும், வண்டியை ஓட்டியவர்களையும் உற்சாகப்படுத்தும் வகையில் சாலையோரம் நின்றிருந்த ஏராளமான பார்வையாளர்கள் ஆரவாரம் செய்தனர்.
இப்போட்டியில் தட்டான் சிட்டு, தேன்சிட்டு, பூஞ்சிட்டு, நடுமாடு, பெரிய மாடு எனப் பல்வேறு பிரிவுகளில் 200-க்கும் மேற்பட்ட ஜோடி மாடுகள் கலந்து கொண்டன.
வெற்றி பெற்ற மாடுகளுக்கும், வண்டியை ஓட்டிய சாரதிகளுக்கும் ரொக்கப் பரிசுகளும் கேடயங்களும் வழங்கப்பட்டன. இந்த மாட்டு வண்டி எல்கை பந்தயத்தை ஆயிரக்கணக்கான பொதுமக்கள் கண்டுகளித்தனர்.
கம்பம் காவல் நிலையக் காவல்துறையினர் பாதுகாப்புப் பணியில் ஈடுபட்டிருந்தனர். விழாவிற்கான ஏற்பாடுகளைப் பிரமலைக்கள்ளர் சமுதாய அமைப்பினர் செய்திருந்தனர்.
வாசகர் கருத்துக்கள் (0)
கருத்துக்களைப் பதிவிட விரும்புகிறீர்களா?
தயவுசெய்து லாகின் செய்து உங்கள் கருத்துக்களைப் பகிர்ந்து கொள்ளுங்கள்.