சிவகங்கை அருகே கார் மற்றும் இருசக்கர வாகனம் நேருக்கு நேர் மோதிய கோர விபத்தில் இரு இளைஞர்கள் சம்பவ இடத்திலேயே உயிரிழந்தனர். இதில், நாளை வேலைக்காக வெளிநாடு செல்லவிருந்த இளைஞரும் உயிரிழந்த சம்பவம் அப்பகுதி மக்களிடையே பெரும் சோகத்தை ஏற்படுத்தியுள்ளது.
சிவகங்கை அருகே மேலபூங்கொடி கிராமத்தைச் சேர்ந்த ஆதிநாராயணன் (26), நாளை வேலைக்காக வெளிநாடு செல்லத் திட்டமிட்டிருந்ததாகக் கூறப்படுகிறது. இந்நிலையில், தனது நண்பர் ஆதிகார்த்தியை அழைத்துக்கொண்டு இருசக்கர வாகனத்தில் சிவகங்கைக்குச் சென்றுவிட்டு, இருவரும் வீட்டிற்குத் திரும்பிக் கொண்டிருந்தனர்.
அப்போது, காரைக்குடியிலிருந்து சிவகங்கை நோக்கி வந்த இன்னோவா கார், ஒக்கூர் பகுதியில் இளைஞர்கள் சென்ற இருசக்கர வாகனத்தின் மீது மோதியது. இந்த விபத்தில் தூக்கி வீசப்பட்ட இரு இளைஞர்களும் பலத்த காயமடைந்து சம்பவ இடத்திலேயே உயிரிழந்தனர்.
தகவலறிந்து சம்பவ இடத்திற்கு வந்த மதகுப்பட்டி காவல் நிலைய போலீசார், இருவரின் உடல்களையும் மீட்டு உடற்கூறு ஆய்வுக்காக சிவகங்கை அரசு மருத்துவக் கல்லூரி மருத்துவமனைக்கு அனுப்பி வைத்தனர். மேலும், விபத்து குறித்து வழக்குப் பதிவு செய்து விசாரணை மேற்கொண்டு வருகின்றனர்.
நாளை வெளிநாடு செல்லவிருந்த இளைஞர், இன்று சாலை விபத்தில் உயிரிழந்த சம்பவம் உறவினர்கள், நண்பர்கள் மற்றும் கிராம மக்களிடையே பெரும் சோகத்தை ஏற்படுத்தியுள்ளது.
வாசகர் கருத்துக்கள் (0)
கருத்துக்களைப் பதிவிட விரும்புகிறீர்களா?
தயவுசெய்து லாகின் செய்து உங்கள் கருத்துக்களைப் பகிர்ந்து கொள்ளுங்கள்.