காந்தி ஜெயந்தியை முன்னிட்டு கோவையில் 157 சைக்கிளிஸ்டுகள் பங்கேற்ற பிரமாண்ட பேரணி நடைபெற்றது. போதைப்பொருள் இல்லாத சமூகத்தை உருவாக்க அனைவரும் ஒன்றிணைந்து செயல்பட வேண்டும் என உறுதிமொழி ஏற்கப்பட்டது.
மகாத்மா காந்தியின் பிறந்தநாளை முன்னிட்டு, நாட்டின் ஒற்றுமை, சுதந்திர உணர்வு, ஒழுக்கம் மற்றும் போதைப்பொருள் எதிர்ப்பு உள்ளிட்ட சமூக விழிப்புணர்வை வலியுறுத்தி கோவையில் பிரமாண்ட சைக்கிள் பேரணி நடைபெற்றது.காந்தி ஜெயந்தி சைக்கிள் விழிப்புணர்வு 2026 எனும் தலைப்பில் நடைபெற்ற இந்தப் பேரணியில், 6 வயது சிறுவர்கள் முதல் 75 வயது முதியவர்கள் வரை மொத்தம் 157 சைக்கிளிஸ்டுகள் பங்கேற்றனர். கோவை மாநகர காவல்துறை அதிகாரிகளும் பேரணியில் கலந்து கொண்டு விழிப்புணர்வு ஏற்படுத்தினர்.
கோவை நவஇந்தியா பகுதியில் இருந்து சைக்கிள் பேரணி தொடங்கியது. அங்கிருந்து அவிநாசி சாலை வழியாக சிட்ரா, நீலம்பூர், கருமத்தம்பட்டி வரை சென்ற சைக்கிளிஸ்டுகள், பின்னர் அதே வழியாக மீண்டும் நவஇந்தியா ஸ்போர்ட்ஸ் ஹைவ் பகுதிக்கு திரும்பினர். சுமார் 2 மணி நேரம் நடைபெற்ற இந்தப் பேரணியில் 50 கிலோமீட்டர் தூரம் சைக்கிளில் பயணித்து சமூக விழிப்புணர்வு ஏற்படுத்தினர். சிறுவர்கள் முதல் முதியவர்கள் வரை பல்வேறு வயதினரும் ஆர்வத்துடன் பங்கேற்றது பொதுமக்களின் கவனத்தை ஈர்த்தது.
பேரணி குறித்து சமூக ஆர்வலரும் சைக்கிளிஸ்டுமான ஜி.டி. விஷ்ணுராம் கூறுகையில், நாட்டின் ஒற்றுமை, சுதந்திர உணர்வு, ஒழுக்கம் மற்றும் போதைப்பொருள் எதிர்ப்பு உள்ளிட்ட கருத்துகளை மக்களிடம் கொண்டு சேர்க்கும் நோக்கில் இந்த சைக்கிள் பேரணி நடத்தப்பட்டதாக தெரிவித்தார். வளமான தேசத்திற்கு அடிப்படையாக தன்னலமற்ற தேசப்பற்று இருக்க வேண்டும் என்றும், நாட்டின் ஒற்றுமை மற்றும் ஒழுக்கத்தை இன்றைய தலைமுறையினர் கடைப்பிடிப்பது அவசியம் என்றும் அவர் குறிப்பிட்டார்.
மேலும், வருங்கால தலைமுறையை பாதுகாக்க போதைப்பொருள் இல்லாத சமூகத்தை உருவாக்க அனைவரும் ஒன்றிணைந்து செயல்பட வேண்டும் என்றும், விளையாட்டு மற்றும் உடற்பயிற்சி இளைஞர்களுக்கு நம்பிக்கையையும் ஒழுக்கத்தையும் வளர்க்கும் என்றும் தெரிவித்தார்.
நாட்டின் சுதந்திரத்திற்காக பாடுபட்ட தியாகிகளின் உணர்வுகளை போற்றி, நாட்டை வளமான தேசமாக உருவாக்க அனைவரும் ஒன்றிணைந்து செயல்பட வேண்டும் என்ற விழிப்புணர்வை ஏற்படுத்தும் வகையில் இந்த சைக்கிள் பேரணி நடைபெற்றதாக ஜி.டி. விஷ்ணுராம் தெரிவித்தார்.
வாசகர் கருத்துக்கள் (0)
கருத்துக்களைப் பதிவிட விரும்புகிறீர்களா?
தயவுசெய்து லாகின் செய்து உங்கள் கருத்துக்களைப் பகிர்ந்து கொள்ளுங்கள்.