‘வெற்றித் தமிழகம்’ தொலைநோக்குத் திட்டத்தின் ஓர் அங்கமாக, ‘வெற்றிப் பயணம்’ என்ற புதிய திட்டம் அக்டோபர் 2-ஆம் தேதி முதல் செயல்படுத்தப்படும் என தமிழ்நாடு முதலமைச்சர் திரு. ச. ஜோசப் விஜய் சட்டமன்றப் பேரவையில் விதி எண் 110-ன் கீழ் அறிவித்தார்.
மகளிரின் பயணச் சுதந்திரம் அவர்களின் கல்வி, வேலைவாய்ப்பு, மருத்துவம், வணிகம் மற்றும் பொருளாதார முன்னேற்றத்துடன் நேரடியாக தொடர்புடையது என்பதைச் சுட்டிக்காட்டிய முதலமைச்சர், போக்குவரத்துக் கட்டணம் காரணமாக எந்தப் பெண்ணும் தனது வாய்ப்புகளை இழக்கக் கூடாது என்ற சமூகநீதிக் கொள்கையின் அடிப்படையில் இத்திட்டம் விரிவுபடுத்தப்படுவதாக தெரிவித்தார்.
அனைத்து வகை பேருந்துகளிலும் கட்டணமில்லா பயணம்
தற்போது நடைமுறையில் உள்ள மகளிர் கட்டணமில்லாப் பயணத் திட்டத்தில் உள்ள கட்டுப்பாடுகள் நீக்கப்பட்டு, முதல் கட்டமாக:
மாநகரம் மற்றும் நகரங்களில் இயக்கப்படும் சாதாரணப் பேருந்துகளுடன், Express, LSS, Deluxe பேருந்துகளிலும் மகளிர் கட்டணமின்றி பயணம் செய்யலாம்.
மாவட்டங்களுக்கு இடையே பயணம் செய்யும் வகையில் புறநகர் (Mofussil) சாதாரணக் கட்டணப் பேருந்துகளிலும் கட்டணமின்றி பயணம் செய்யலாம்.
மலைப்பகுதிகளில் இயக்கப்படும் சாதாரணக் கட்டணப் பேருந்துகளிலும் மகளிர் இலவசமாகப் பயணிக்கலாம்.
இத்திட்டத்தின் கீழ் பயணம் செய்ய வருமான உச்சவரம்பு கிடையாது.
ஒரு பெண் மேற்கொள்ளும் பயணங்களின் எண்ணிக்கைக்கும் எந்தக் கட்டுப்பாடும் இல்லை.
திருநங்கைகளும் (Transgender) இத்திட்டத்தின் கீழ் கட்டணமின்றி பயணம் செய்யலாம்.
மாணவிகள் முதல் தொழிலாளர்கள் வரை பயன்
‘வெற்றிப் பயணம்’ திட்டத்தின் மூலம் மாணவிகள் தொலைதூரக் கல்லூரிகளுக்குச் செல்வதற்கும், பெண்கள் பணியிடங்களுக்குச் செல்வதற்கும், மருத்துவம் மற்றும் அத்தியாவசியத் தேவைகளுக்காகப் பயணம் செய்வதற்கும் பொதுப் போக்குவரத்தை கட்டணமின்றி பயன்படுத்த முடியும்.
இத்திட்டம் வெறும் இலவசப் பேருந்துப் பயணத் திட்டமாக மட்டும் இல்லாமல், ஒரு மாணவியின் கல்வி, ஒரு தொழிலாளியின் வேலைவாய்ப்பு, ஒரு தாயின் குடும்பப் பொறுப்பு, ஒரு தொழில்முனைவோரின் முன்னேற்றம் ஆகியவற்றை உறுதிசெய்யும் சமூக முதலீடாக அமையும் என அரசு தெரிவித்துள்ளது.
மேலும், ‘வெற்றிப் பயணம்’ திட்டம் எதிர்காலத்தில் இதர சேவைகளுக்கும் படிப்படியாக விரிவுபடுத்தப்படும் என அறிவிக்கப்பட்டுள்ளது.
ஆண்டுக்கு ரூ.6,000 கோடி செலவு
‘வெற்றிப் பயணம்’ திட்டத்தை செயல்படுத்துவதன் மூலம் அரசுக்கு ஆண்டுதோறும் தோராயமாக ரூ.6,000 கோடி செலவினம் ஏற்படும் என முதலமைச்சர் அறிவித்தார்.
மாநிலத்தின் எந்தப் பகுதியில் வாழ்ந்தாலும் மகளிரின் இயக்கச் சுதந்திரத்தையும் பொருளாதார முன்னேற்றத்தையும் உறுதி செய்வதே இத்திட்டத்தின் நோக்கம் என்றும், இதன் மூலம் குடும்பங்கள் முன்னேறி, சமூகநீதி மற்றும் சமத்துவம் வலுப்பெற்று, வளமான ‘வெற்றித் தமிழ்நாடு’ உருவாகும் என்றும் முதலமைச்சர் தெரிவித்தார்.
வாசகர் கருத்துக்கள் (0)
கருத்துக்களைப் பதிவிட விரும்புகிறீர்களா?
தயவுசெய்து லாகின் செய்து உங்கள் கருத்துக்களைப் பகிர்ந்து கொள்ளுங்கள்.