உத்தமபாளையம் ,தேனி: தேனி மாவட்டம், உத்தமபாளையத்தில் உள்ள அல்கிக்மா மெட்ரிக் மேல்நிலைப் பள்ளியில், 2026-ஆம் ஆண்டிற்கான அறிவியல் கண்காட்சி மாணவர்களின் சிறப்பான பங்களிப்புடன் நடைபெற்றது.
கண்காட்சியின் சிறப்பம்சங்கள்: இந்த விழாவில், பள்ளி மாணவ-மாணவியர் 200-க்கும் மேற்பட்டோர் கலந்துகொண்டு, ரோபோ, விர்ச்சுவல் ரியாலிட்டி (VR) கிட், 3D பிரிண்டர் மற்றும் ரேடார் சிக்னல் கண்டறியும் இயந்திரம் போன்ற நவீன தொழில்நுட்பப் படைப்புகளைக் காட்சிப்படுத்தினர். தொழில்நுட்பத்தோடு மட்டும் நின்றுவிடாமல், தமிழ் கலாச்சாரத்தைப் பறைசாற்றும் வகையிலும் மாணவர்கள் பல்வேறு படைப்புகளை வடிவமைத்திருந்தனர். குறிப்பாக, தஞ்சைப் பெரிய கோயில் மாதிரி, பண்டைய கால மக்களின் வாழ்க்கை முறை, அவர்கள் பயன்படுத்திய மண்பாண்டங்கள் மற்றும் கீழடி அகழ்வாராய்ச்சி மையம் போன்றவற்றை தத்ரூபமாக அமைத்து பார்வையாளர்களை வியக்க வைத்தனர்.
விண்வெளி ஆய்வும் ராக்கெட் ஏவுதளமும்: இந்நிகழ்ச்சியின் உச்சகட்டமாக, விண்வெளிக்கு ராக்கெட் அனுப்பும் முறையை மாணவர்களுக்கு விளக்கும் வகையில், பள்ளி நிர்வாகத்தின் சார்பில் மாதிரி ஏவுதளம் ஒன்று அமைக்கப்பட்டது. தத்ரூபமாக ராக்கெட் ஏவப்பட்ட அந்த நிகழ்வு, பெற்றோர்கள் மற்றும் மாணவர்களிடையே பெரும் வரவேற்பைப் பெற்றது.
அறிவியல் கண்காட்சியில் தங்களது திறமையை வெளிப்படுத்திய மாணவர்களுக்கு, பரிசுகளும் சான்றிதழ்களும் வழங்கி கௌரவிக்கப்பட்டனர். இந்நிகழ்ச்சியில் சிறப்பு விருந்தினராகக் கீர்த்தி சக்கரா விருது பெற்ற ராணுவ வீரர் மீனாட்சி சுந்தரம் கலந்துகொண்டார். மேலும், பள்ளியின் ஆசிரியர்கள், பெற்றோர்கள் மற்றும் ஏராளமான பார்வையாளர்கள் கலந்துகொண்டு சிறப்பித்தனர்
வாசகர் கருத்துக்கள் (0)
கருத்துக்களைப் பதிவிட விரும்புகிறீர்களா?
தயவுசெய்து லாகின் செய்து உங்கள் கருத்துக்களைப் பகிர்ந்து கொள்ளுங்கள்.