விருதுநகர் உயிரியல் கட்டுப்பாட்டு ஆய்வகத்தில் தங்கப்பழம் வேளாண்மைக் கல்லூரி மாணவர்களுக்கு செயல்முறை பயிற்சி நடைபெற்றது.
விருதுநகர் மாவட்ட வேளாண்மைத் துறையின் கீழ் செயல்பட்டு வரும் உயிரியல் கட்டுப்பாட்டு ஆய்வகத்திற்கு தங்கப்பழம் வேளாண்மைக் கல்லூரியைச் சேர்ந்த 80 மாணவ, மாணவிகள் கல்விச் சுற்றுலாவின் ஒரு பகுதியாக வருகை தந்து ஆய்வகத்தின் செயல்பாடுகளை நேரில் பார்வையிட்டு பயனடைந்தனர்.
மாணவர்களை வரவேற்ற வேளாண்மை அலுவலர் கா. அரிபுத்திரன், இயற்கை வேளாண்மை மற்றும் நிலையான விவசாயத்தில் உயிரியல் கட்டுப்பாட்டின் பங்கு குறித்து விரிவாக எடுத்துரைத்தார். பயிர்களைத் தாக்கும் பூச்சிகள் மற்றும் நோய்களை ரசாயன பூச்சிக்கொல்லி மருந்துகளை அதிகம் சாராமல், இயற்கை எதிரி உயிரினங்கள் மற்றும் நுண்ணுயிரிகளின் மூலம் கட்டுப்படுத்துவதன் அவசியம், அதன் சுற்றுச்சூழல் மற்றும் மனித நலன் சார்ந்த நன்மைகள் குறித்து விளக்கமளித்தார்.
தொடர்ந்து, உயிரியல் காரணிகளின் பல்வேறு வகைகள், அவற்றின் பண்புகள், பயிர் பாதுகாப்பில் அவற்றின் பயன்பாடுகள், ஆய்வகத்தில் மேற்கொள்ளப்படும் உற்பத்தி முறைகள், தரப் பராமரிப்பு நடைமுறைகள் மற்றும் சேமிப்பு முறைகள் குறித்து செயல்முறை விளக்கத்துடன் பயிற்சி அளிக்கப்பட்டது. மேலும், உயிரியல் கட்டுப்பாட்டு ஆய்வகத்தில் தினசரி மேற்கொள்ளப்படும் உற்பத்திப் பணிகள், உயிரியல் காரணிகளை பெருமளவில் உற்பத்தி செய்யும் தொழில்நுட்பங்கள், விவசாயிகளுக்கு வழங்கப்படும் சேவைகள், களத்தில் உயிரியல் காரணிகளை பயன்படுத்தும் முறைகள், பயன்பாட்டு அளவுகள், பயன்படுத்த வேண்டிய காலம் மற்றும் அவற்றின் செயல்திறனை அதிகரிக்கும் வழிமுறைகள் குறித்து மாணவர்களுக்கு தெளிவாக எடுத்துரைக்கப்பட்டது.
உயிரியல் கட்டுப்பாட்டு தொழில்நுட்பங்களின் எதிர்காலத் தேவைகள், சுற்றுச்சூழலுக்கு உகந்த விவசாய முறைகளில் அவற்றின் முக்கியத்துவம், வேளாண் பட்டதாரிகளுக்கு இத்துறையில் உள்ள வேலைவாய்ப்புகள், தொழில்முனைவோர் வாய்ப்புகள் மற்றும் ஆராய்ச்சி சார்ந்த வளர்ச்சி வாய்ப்புகள் குறித்தும் விரிவாக விளக்கமளிக்கப்பட்டது.
பயிற்சியின் ஒரு பகுதியாக ஆய்வகத்தில் தயாரிக்கப்படும் உயிரியல் காரணிகள், அவற்றின் உற்பத்தி அறைகள், வளர்ப்பு வசதிகள் மற்றும் தரக் கண்காணிப்பு நடைமுறைகளை மாணவர்கள் நேரில் பார்வையிட்டு, தங்களது சந்தேகங்களுக்கு விளக்கங்களைப் பெற்றனர். செயல்முறை விளக்கங்களுடன் நடைபெற்ற இந்தப் பயிற்சி மாணவர்களுக்கு பயனுள்ள அனுபவமாக அமைந்தது.
இந்நிகழ்வில் கல்லூரி பேராசிரியர்கள், ஆய்வக அலுவலர்கள் மற்றும் பணியாளர்கள் கலந்து கொண்டு மாணவர்களுக்கு தேவையான வழிகாட்டுதல்களை வழங்கினர். சுற்றுச்சூழலுக்கு உகந்த, நிலையான வேளாண்மை நடைமுறைகளை மாணவர்கள் எதிர்காலத்தில் விவசாயிகளிடம் கொண்டு சேர்க்கும் வகையில் இந்தக் கல்விச் சுற்றுலா சிறப்பாக அமைந்தது.
வாசகர் கருத்துக்கள் (0)
கருத்துக்களைப் பதிவிட விரும்புகிறீர்களா?
தயவுசெய்து லாகின் செய்து உங்கள் கருத்துக்களைப் பகிர்ந்து கொள்ளுங்கள்.